ik din kisī makkhī se ye kahne lagā makḌā
is raah se hotā hai guzar roz tumhārā
lekin mirī kuTiyā kī na jaagī kabhī qismat
bhūle se kabhī tum ne yahāñ paañv na rakkhā
ġhairoñ se na miliye to koī baat nahīñ hai
apnoñ se magar chāhiye yuuñ khiñch ke na rahnā
aao jo mire ghar meñ to izzat hai ye merī
vo sāmne sīḌhī hai jo manzūr ho aanā
makkhī ne sunī baat jo makḌe kī to bolī
hazrat kisī nādān ko dījegā ye dhokā
is jaal meñ makkhī kabhī aane kī nahīñ hai
jo aap kī sīḌhī pe chaḌhā phir nahīñ utrā
makḌe ne kahā vaah farebī mujhe samjhe
tum sā koī nādān zamāne meñ na hogā
manzūr tumhārī mujhe ḳhātir thī vagarna
kuchh fā.eda apnā to mirā is meñ nahīñ thā
uḌtī huī aa.ī ho ḳhudā jaane kahāñ se
Thahro jo mire ghar meñ to hai is meñ burā kyā
is ghar meñ ka.ī tum ko dikhāne kī haiñ chīzeñ
bāhar se nazar aatā hai chhoTī sī ye kuTiyā
laTke hue darvāzoñ pe bārīk haiñ parde
dīvāroñ ko ā.īnoñ se hai maiñ ne sajāyā
mehmānoñ ke ārām ko hāzir haiñ bichhaune
har shaḳhs ko sāmāñ ye mayassar nahīñ hotā
makkhī ne kahā ḳhair ye sab Thiik hai lekin
maiñ aap ke ghar aa.uuñ ye ummīd na rakhnā
in narm bichhaunoñ se ḳhudā mujh ko bachā.e
so jaa.e koī in pe to phir uTh nahīñ saktā
makḌe ne kahā dil meñ sunī baat jo us kī
phāñsūñ ise kis tarah ye kam-baḳht hai daanā
sau kaam ḳhushāmad se nikalte haiñ jahāñ meñ
dekho jise duniyā meñ ḳhushāmad kā hai bandā
ye soch ke makkhī se kahā us ne baḌī b
allāh ne baḳhshā hai baḌā aap ko rutba
hotī hai use aap kī sūrat se mohabbat
ho jis ne kabhī ek nazar aap ko dekhā
āñkheñ haiñ ki hiire kī chamaktī huī kaniyāñ
sar aap kā allāh ne kalġhī se sajāyā
ye husn ye poshāk ye ḳhūbī ye safā.ī
phir us pe qayāmat hai ye uḌte hue gaanā
makkhī ne sunī jab ye ḳhushāmad to pasījī
bolī ki nahīñ aap se mujh ko koī khaTkā
inkār kī aadat ko samajhtī huuñ burā maiñ
sach ye hai ki dil toḌnā achchhā nahīñ hotā
ye baat kahī aur uḌī apnī jagah se
paas aa.ī to makḌe ne uchhal kar use pakḌā
bhūkā thā ka.ī roz se ab haath jo aa.ī
ārām se ghar baiTh ke makkhī ko uḌāyā
