kahūñ kis se raat kā mājrā na.e manzaroñ pe nigāh thī
na kisī kā dāman-e-chāk thā na kisī kī tarf-e-kulāh thī
ka.ī chāñd the sar-e-āsmāñ ki chamak chamak ke palaT ga.e
na lahū mire hī jigar meñ thā na tumhārī zulf siyāh thī
dil-e-kam-alam pe vo kaifiyat ki Thahar sake na guzar sake
na hazar hī rāhat-e-rūh thā na safar meñ rāmish raah thī
mire chār-dāñg thī jalvagar vahī lazzat-e-talab-e-sahar
magar ik ummīd-e-shikasta-par ki misāl-e-dard siyāh thī
vo jo raat mujh ko baḌe adab se salām kar ke chalā gayā
use kyā ḳhabar mire dil meñ bhī kabhī ārzū-e-gunāh thī
