jā basā maġhrib meñ āḳhir ai makāñ terā makīñ
aah! mashriq kī pasand aa.ī na us ko sarzamīñ
aa gayā aaj is sadāqat kā mire dil ko yaqīñ
zulmat-e-shab se ziyā-e-roz-e-furqat kam nahīñ
”tāz āġhosh-e-vidā’ish dāġh-e-hairat chīda ast
ham-chū sham-e-kushta dar-chashm-e-nigah ḳhvābīda ast”
kushta-e-uzlat huuñ ābādī meñ ghabrātā huuñ maiñ
shahr se saudā kī shiddat meñ nikal jaatā huuñ maiñ
yād-e-ayyām-e-salaf se dil ko taḌpātā huuñ maiñ
bahr-e-taskīñ terī jānib dauḌtā aatā huuñ maiñ
aañkh ko mānūs hai tere dar-o-dīvār se
ajnabiyyat hai magar paidā mirī raftār se
zarra mere dil kā ḳhurshīd-āshnā hone ko thā
aa.ina TuuTā huā ālam-numā hone ko thā
naḳhl merī ārzūoñ kā harā hone ko thā
aah! kyā jaane koī maiñ kyā se kyā hone ko thaa!
abr-e-rahmat dāman-az-gulzār-e-man barchīd-o-raft
añdkai bar-ġhuncha haa.e aarzū bārīd-o-raft
tū kahāñ hai ai kalīm-e-zarra-e-sīnā-e-ilm!
thī tirī mauj-e-nafas bād-e-nashāt-afzā-e-ilm
ab kahāñ vo shauq-e-rah-paimā.ī-e-sahrā-e-ilm
tere dam se thā hamāre sar meñ bhī saudā-e-ilm
”shor-e-lailā ko ki bāz-ārā.ish-e-saudā kunad
ḳhāk-e-majnūñ-rā ġhubār-e-ḳhātir-e-sahrā kunad”
khol degā dasht-e-vahshat uqda-e-tadīr ko
toḌ kar pahuñchūñgā maiñ punjab kī zanjīr ko
dekhtā hai dīda-e-hairāñ tirī tasvīr ko
kyā tasallī ho magar girvīda-e-taqrīr ko
”tāb-e-goyā.ī nahīñ rakhtā dahan tasvīr kā
ḳhāmushī kahte haiñ jis ko hai suḳhan tasvīr kaa”
