huā ḳhema-zan kārvān-e-bahār
iram ban gayā dāman-e-koh-sār
gul o nargis o sosan o nastaran
shahīd-e-azal lāla-ḳhūnīñ kafan
jahāñ chhup gayā parda-e-rañg meñ
lahū kī hai gardish rag-e-sañg meñ
fazā niilī niilī havā meñ surūr
Thaharte nahīñ āshiyāñ meñ tuyūr
vo jū-e-kohistāñ uchaktī huī
aTaktī lachaktī saraktī huī
uchhaltī phisaltī sambhaltī huī
baḌe pech khā kar nikaltī huī
ruke jab to sil chiir detī hai ye
pahāḌoñ ke dil chiir detī hai ye
zarā dekh ai sāqi-e-lāla-fām
sunātī hai ye zindagī kā payām
pilā de mujhe vo mai-e-parda-soz
ki aatī nahīñ fasl-e-gul roz roz
vo mai jis se raushan zamīr-e-hayāt
vo mai jis se hai masti-e-kā.enāt
vo mai jis meñ hai soz-o-sāz-e-azal
vo mai jis se khultā hai rāz-e-azal
uThā sāqiyā parda is raaz se
laḌā de mamūle ko shahbāz se
zamāne ke andāz badle ga.e
nayā raag hai saaz badle ga.e
huā is tarah faash rāz-e-farañg
ki hairat meñ hai shīsha-bāz-e-farañg
purānī siyāsat-garī ḳhvār hai
zamīñ miir o sultāñ se be-zār hai
gayā daur-e-sarmāya-dār gayā
tamāshā dikhā kar madārī gayā
girāñ ḳhvāb chīnī sambhalne lage
himāla ke chashme ubalne lage
dil-e-tūr-e-sīnā-o-fārān do-nīm
tajallī kā phir muntazir hai kalīm
musalmāñ hai tauhīd meñ garam-josh
magar dil abhī tak hai zunnār-posh
tamaddun tasavvuf sharī.at-e-kalām
butān-e-ajam ke pujārī tamām
haqīqat ḳhurāfāt meñ kho ga.ī
ye ummat rivāyāt meñ kho ga.ī
lubhātā hai dil ko kalām-e-ḳhatīb
magar lazzat-e-shauq se be-nasīb
bayāñ is kā mantiq se suljhā huā
luġhat ke bakheḌoñ meñ uljhā huā
vo suufī ki thā ḳhidmat-e-haq meñ mard
mohabbat meñ yaktā hamīyat meñ fard
ajam ke ḳhayālāt meñ kho gayā
ye sālik maqāmāt meñ kho gayā
bujhī ishq kī aag andher hai
musalmāñ nahīñ raakh kā Dher hai
sharāb-e-kuhan phir pilā sāqiyā
vahī jaam gardish meñ lā sāqiyā
mujhe ishq ke par lagā kar uḌā
mirī ḳhaak jugnū banā kar uḌā
ḳhirad ko ġhulāmī se āzād kar
javānoñ ko pīroñ kā ustād kar
harī shāḳh-e-millat tire nam se hai
nafas is badan meñ tire dam se hai
taḌapne phaḌakne kī taufīq de
dil-e-murtazā soz-e-siddīq de
jigar se vahī tiir phir paar kar
tamannā ko sīnoñ meñ bedār kar
tire āsmānoñ ke tāroñ kī ḳhair
zamīnoñ ke shab zinda-dāroñ kī ḳhair
javānoñ ko soz-e-jigar baḳhsh de
mirā ishq merī nazar baḳhsh de
mirī naav girdāb se paar kar
ye sābit hai to is ko sayyār kar
btā mujh ko asrār-e-marg-o-hayāt
ki terī nigāhoñ meñ hai kā.enāt
mire dīda-e-tar kī be-ḳhvābiyāñ
mire dil kī poshīda betābiyāñ
mire nāla-e-nīm-shab kā niyāz
mirī ḳhalvat o anjuman kā gudāz
umañgeñ mirī ārzūeñ mirī
ummīdeñ mirī justujueñ mirī
mirī fitrat ā.īna-e-rozgār
ġhazālān-e-afkār kā murġh-zār
mirā dil mirī razm-gāh-e-hayāt
gumānoñ ke lashkar yaqīñ kā sabāt
yahī kuchh hai saaqī matā-e-faqīr
isī se faqīrī meñ huuñ maiñ amiir
mire qāfile meñ luTā de ise
luTā de Thikāne lagā de ise
damā-dam ravāñ hai yam-e-zindagī
har ik shai se paidā ram-e-zindagī
isī se huī hai badan kī numūd
ki shole meñ poshīda hai mauj-e-dūd
girāñ garche hai sohbat-e-āb-o-gil
ḳhush aa.ī ise mehnat-e-āb-o-gil
ye sābit bhī hai aur sayyār bhī
anāsir ke phandoñ se be-zār bhī
ye vahdat hai kasrat meñ har dam asiir
magar har kahīñ be-chugoñ be-nazīr
ye aalam ye but-ḳhāna-e-shash-jihāt
isī ne tarāshā hai ye somnāt
pasand is ko takrār kī ḳhū nahīñ
ki tū maiñ nahīñ aur maiñ tū nahīñ
man o tū se hai anjuman-āfrīñ
magar ain-e-mahfil meñ ḳhalvat-nashīñ
chamak us kī bijlī meñ taare meñ hai
ye chāñdī meñ sone meñ paare meñ hai
usī ke bayābāñ usī ke babūl
usī ke haiñ kāñTe usī ke haiñ phuul
kahīñ us kī tāqat se kohsār chuur
kahīñ us ke phande meñ jibra.īl o huur
kahīñ jaza hai shāhīn sīmāb rañg
lahū se chakoroñ ke ālūda chañg
kabūtar kahīñ āshiyāne se duur
phaḌaktā huā jaal meñ nā-subūr
fareb-e-nazar hai sukūn o sabāt
taḌaptā hai har zarra-e-kā.enāt
Thahartā nahīñ kārvān-e-vajūd
ki har lahz hai taaza shān-e-vajūd
samajhtā hai tū raaz hai zindagī
faqat zuaq-e-parvāz hai zindagī
bahut us ne dekhe haiñ past o buland
safar us ko manzil se baḌh kar pasand
safar zindagī ke liye barg o saaz
safar hai haqīqat hazar hai majāz
ulajh kar sulajhne meñ lazzat use
taḌapne phaḌakne meñ rāhat use
huā jab use sāmnā maut kā
kaThin thā baḌā thāmnā maut kā
utar kar jahān-e-makāfāt meñ
rahī zindagī maut kī ghaat meñ
mazāq-e-duī se banī zauj zauj
uThī dasht o kohsār se fauj fauj
gul is shāḳh se TūTte bhī rahe
isī shāḳh se phūTte bhī rahe
samajhte haiñ nādāñ use be-sabāt
ubhartā hai miT miT ke naqsh-e-hayāt
baḌī tez jaulāñ baḌī zūd-ras
azal se abad tak ram-e-yak-nafs
zamāna ki zanjīr-e-ayyām hai
damoñ ke ulaT-pher kā naam hai
ye mauj-e-nafs kyā hai talvār hai
ḳhudī kyā hai talvār kī dhaar hai
ḳhudī kyā hai rāz-darūn-hayāt
ḳhudī kyā hai bedāri-e-kā.enāt
ḳhudī jalva badmast o ḳhalvat-pasand
samundar hai ik buuñd paanī meñ band
andhere ujāle meñ hai tābnāk
man o tū meñ paidā man o tū se paak
azal us ke pīchhe abad sāmne
na had us ke pīchhe na had sāmne
zamāne ke dariyā meñ bahtī huī
sitam us kī maujoñ ke sahtī huī
tajassus kī rāheñ badaltī huī
damā-dam nigāheñ badaltī huī
subuk us ke hāthoñ meñ sañg-e-girāñ
pahāḌ us kī zarboñ se reg-e-ravāñ
safar us kā anjām o āġhāz hai
yahī us kī taqvīm kā raaz hai
kiran chāñd meñ hai sharar sañg meñ
ye be-rañg hai Duub kar rañg meñ
ise vāsta kyā kam-o-besh se
nasheb o farāz o pas-o-pesh se
azal se hai ye kashmakash meñ asiir
huī ḳhāk-e-adām meñ sūrat-pazīr
ḳhudī kā nasheman tire dil meñ hai
falak jis tarah aañkh ke til meñ hai
ḳhudī ke nigah-bāñ ko hai zahr-nāb
vo naañ jis se jaatī rahe us kī aab
vahī naañ hai us ke liye arjumand
rahe jis se duniyā meñ gardan buland
ḳhudī fāl-e-mahmūd se darguzar
ḳhudī par nigah rakh ayāzī na kar
vahī sajda hai lā.iq-e-ehtimām
ki ho jis se har sajda tujh par harām
ye aalam ye hañgāma-e-rañg-o-saut
ye aalam ki hai zer-e-farmān-e-maut
ye aalam ye but-ḳhāna-e-chashm-o-gosh
jahāñ zindagī hai faqat ḳhurd o nosh
ḳhudī kī ye hai manzil-e-avvalīñ
musāfir ye terā nasheman nahīñ
tirī aag is ḳhāk-dāñ se nahīñ
jahāñ tujh se hai tū jahāñ se nahīñ
baḌhe jā ye koh-e-girāñ toḌ kar
tilism-e-zamān-o-makāñ toḌ kar
ḳhudī sher-e-maulā jahāñ us kā said
zamīñ us kī said āsmāñ us kā said
jahāñ aur bhī haiñ abhī be-numūd
ki ḳhālī nahīñ hai zamīr-e-vajūd
har ik muntazir terī yalġhār kā
tirī shauḳhi-e-fikr-o-kirdār kā
ye hai maqsad gardish-e-rozgār
ki terī ḳhudī tujh pe ho āshkār
tū hai fātah-e-ālam-e-ḳhūb-o-zisht
tujhe kyā batā.ūñ tirī sarnavisht
haqīqat pe hai jāma-e-harf-e-tañg
haqīqat hai ā.īna-e-guftār-e-zañg
farozāñ hai siine meñ sham-e-nafas
magar tāb-e-guftār rakhtī hai bas
agar yak-sar-e-mū-e-bartar param
faroġh-e-tajallī ba-sozad param
