ik sañg tarāsh jis ne barsoñ
hīroñ kī tarah sanam tarāshe
aaj apne sanam-kade meñ tanhā
majbūr niDhāl zaḳhm-ḳhurda
din raat paḌā karāhtā hai
chehre pe ujaaḌ zindagī ke
lamhāt kī an-ginat ḳharāsheñ
āñkhoñ ke shikasta marqadoñ meñ
rūThī huī hasratoñ kī lāsheñ
sāñsoñ kī thakan badan kī ThanDak
ehsās se kab talak lahū le
hāthoñ meñ kahāñ sakat ki baḌh kar
ḳhud-sāḳhta pīkarāñ ko chhū le
ye zaḳhm-e-talab ye nā-murādī
har but ke laboñ pe hai tabassum
ai tesha-ba-dast devtāo!
taḳhlīq aziim hai ki ḳhāliq
insān javāb chāhtā hai