(undulus ke maidān-e-jañg meñ)
ye ġhāzī ye tere pur-asrār bande
jinheñ tū ne baḳhshā hai zauq-e-ḳhudā.ī
do-nīm un kī Thokar se sahrā o dariyā
simaT kar pahāḌ un kī haibat se raa.ī
do-ālam se kartī hai begāna dil ko
ajab chiiz hai lazzat-e-āshnā.ī
shahādat hai matlūb-o-maqsūd-e-momin
na māl-e-ġhanīmat na kishvar-kushā.ī
ḳhayābāñ meñ hai muntazir laala kab se
qabā chāhiye us ko ḳhūn-e-arab se
kiyā tū ne sahrā-nashīnoñ ko yaktā
ḳhabar meñ nazar meñ azān-e-sahar meñ
talab jis kī sadiyoñ se thī zindagī ko
vo soz us ne paayā unhīñ ke jigar meñ
kushād-e-dar-e-dil samajhte haiñ us ko
halākat nahīñ maut un kī nazar meñ
dil-e-mard-e-momin meñ phir zinda kar de
vo bijlī ki thī nāra-e-lā-tazar meñ
azā.em ko sīnoñ meñ bedār kar de
nigāh-e-musalmāñ ko talvār kar de
