ye tirī āñkhoñ kī be-zārī ye lahje kī thakan
kitne andeshoñ kī hāmil haiñ ye dil kī dhaḌkaneñ
pesh-tar is ke ki ham phir se muḳhālif samt ko
be-ḳhudā-hāfiz kahe chal deñ jhukā kar gardaneñ
aao us dukh ko pukāreñ jis kī shiddat ne hameñ
is qadar ik dūsre ke ġham se vābasta kiyā
vo jo tanhā.ī kā dukh thā talḳh mahrūmī kā dukh
jis ne ham ko dard ke rishte meñ paivasta kiyā
vo jo is ġham se ziyāda jāñ-gusil qātil rahā
vo jo ik sail-e-balā-añgez thā apne liye
jis ke pal pal meñ the sadiyoñ ke samundar maujzan
chīḳhtī yādeñ liye ujḌe hue sapne liye
maiñ bhī nākām-e-vafā thā to bhī mahrūm-e-murād
ham ye samjhe the ki dard-e-mushtarak raas aa gayā
terī khoī muskurāhaT qahqahoñ meñ Dhal ga.ī
merā gum-gashta sukūñ phir se mire paas aa gayā
taptī do-pahroñ meñ āsūda hue baazū mire
terī zulfeñ is tarah bikhrīñ ghaTā.eñ ho ga.iiñ
terā barfīlā badan be-sāḳhta lau de uThā
merī sāñseñ shaam kī bhīgī havā.eñ ho ga.iiñ
zindagī kī sā.ateñ raushan thiiñ sham.oñ kī tarah
jis tarah se shaam guzre jugnuoñ ke shahr meñ
jis tarah mahtāb kī vaadī meñ do saa.e ravāñ
jis tarah ghuñghrū chhanak uTTheñ nashe kī lahr meñ
aao ye socheñ bhī qātil haiñ to behtar hai yahī
phir se ham apne purāne zahr ko amrit kaheñ
tū agar chāhe to ham ik dūsre ko chhoḌ kar
apne apne be-vafāoñ ke liye rote raheñ
