tujh se bichhaḌ ke ham bhī muqaddar ke ho ga.e
phir jo bhī dar milā hai usī dar ke ho ga.e
phir yuuñ huā ki ġhair ko dil se lagā liyā
andar vo nafrateñ thiiñ ki bāhar ke ho ga.e
kyā log the ki jaan se baḌh kar aziiz the
ab dil se mahv naam bhī aksar ke ho ga.e
ai yaad yaar tujh se kareñ kyā shikāyateñ
ai dard-e-hijr ham bhī to patthar ke ho ga.e
samjhā rahe the mujh ko sabhī nāsehān-e-shahr
phir rafta rafta ḳhud usī kāfar ke ho ga.e
ab ke na intizār kareñ chāragar ki ham
ab ke ga.e to kū-e-sitamgar ke ho ga.e
rote ho ik jazīra-e-jāñ ko ‘farāz’ tum
dekho to kitne shahr samundar ke ho ga.e
